மாற்றம்

ஒரு நிமிடம் உன்னைப் பிரிந்து இருக்க

ஒருபோதும் முடியாது என்றாய் நீ அன்று

ஒரு பத்து நாளாவது என்னை

ஒண்டியாய் இருக்கவிடு என்கிறாய் நீ இன்று

மெலிதாய் தலைவலி என்றாலும்

மனமுடைந்து போகும் என்றாய் நீ அன்று

மண்டையே பிளக்குது என்றாலும்

வேற வேலையில்லை என்கிறாய் நீ இன்று

பேசுவதை நிறுத்தாதே கண்ணே

பேதலித்திடும் என் மனது என்றாய் நீ அன்று

பேச ஆரம்பித்தால் நிறுத்தவே தெரியாதா

பெண்ணே உனக்கு என்கிறாய் நீ இன்று

என்னடா கண்ணே என்றாய் நீ அன்று

என்னடி பெண்ணே என்கிறாய் நீ இன்று

அன்று நீ காதலன் இன்றோ நீ கணவன்

காதலனாய் இருந்தவரை இனிமையாய் நீ இப்படி

கணவனானதும் இந்த மாற்றம் எப்படி?